عاشق اُول لحظه کی عشقینن آچیب اَل گوتوره
بیل یقین عرصه ی عشقینده مرامین ایتریب
عشق اگر عشق اُولا عالم یغیشا اَسگیلمز
بیلمسه عشقینین عطرین، اُول مشامین ایتریب
سنه اَوَل باخیشیم دا اِله عاشق اولدوم
تیتیریب دیل دوداغیم عرض سلامین ایتریب
منی محروم اِلمه نازلی گوزونن گوزلیم
گوزلرین صحبت اِدیر ، گرچه کلامین ایتریب
بیر سِری جام لبونن منی سیراب اِلدون
بیر عُمیر بخت قَرا شیشه ی جامین ایتریب
منی دیوانه اِدیب سالما چوله نازلی غزال
بیر نظر باخ کی بو دیوانه صلاحین ایتریب
اوقَدَر سینه می محروم اِلیبسن قوجاقونان
قلبمین ضربه لری نظم و نظامین ایتریب
هرگجه راز و نیازیمده سنی ایستمیشم
جَلد اولان گوش کیمی کی گوشه ی بامین ایتریب
من اگر " قاصد" اولام تکجه سن سن خبریم
اِله شوقیله گلیب شرح پیامین ایتریب